உண்மைக்கு உறைவிடமான வசிட்ட முனிவனது  வார்த்தை;  செவியில்
சாராத முன்னம் -(தங்கள்)  காதுகளில் சேர்வதற்கு முன்னமே; ஆராத
காதல் அரசர்களும்- (இராமனதுமுடிசூட்டு விழாவில்) அடங்காத அன்பை
உடைய அரசர்களும்;  அந்தணரும் - வேதியரும்;  மற்று உள்ள
மாந்தர்களும் - வேறு உள்ள மனிதர்களும்;  வார் ஆர் முலையாரும் -
கச்சணிந்த தனத்தையுடைய  மகளிரும்;  தயரதனைப் போல் வீழ்ந்தார்-

     மற்றுள்ள மாந்தர்கள் - அமைச்சர்,  சேனைத் தலைவர்,  தூதுவர்
முதலியவர்.  பெண்டிர்துன்பம்  பெரிதாய்த் தோன்றுமாதலின் செய்யுளில்
முதற்கண் உரைக்கப்பட்டது.  தயரதன்தன்மகன் காரணமாகத் துன்பத்தில்
ஆழ்ந்தது  போலவே அத்தகைய அன்புடையவர்கள் இவர்களும்ஆதலின்
‘தயரதனைப் போல் ’ துன்புற்றார் என்றார்.  அதனையே ‘ஆராத காதல்’
எனவும் கூறினார்.                                             92

     உடம்பு எல்லாம் -மக்கள் உடல்கள் எல்லாம்; புண் உற்ற தீயின்-
புண்ணில் பட்ட நெருப்புப் போல; புகை உற்று - அனல் மூச்சு விட்டு;
உயிர் பதைப்ப- உயிர் துடிதுடிக்க; மண் உற்று - நிலத்தில் பொருந்தி;
அயர்ந்து -சோர்ந்து; மறுகிற்று - சுழன்று புரண்டது; கண் உற்ற வாரி -
கண்ணிலிருந்து வந்தநீர்ப்பெருக்கு; கடல் உற்றது - கடலாகப் பெருகியது;
எம் மருங்கும் - எப்பக்கத்திருந்தும்; விட்டு அழுத பேரோசை -
(எல்லோரும்) வாய்விட்டு அழுத குரல் ஒலி;விண் உற்றது - வானத்தை
அடைந்தது.

     ‘உடம்பு எல்லாம் மறுகிற்று’ ஒருமை பன்மை மயக்கம். தொகுதி
ஒருமை எனக் கூறி வழாநிலைஎனலும் ஆம். கண்ணீர்ப் பெருக்கு கடலைச்
சென்று அடைந்தது எனலும்ஆம்.                                93