காற்றும்; கதிரொடும் திரிய - கதிரவன் நிலவு உடன் சுழல; காவல்
விண்ணகம் திரிய - தேவர்கள் காக்கும் மேல் உலகம் சுழல; மேலை
விரிஞ்சனும் திரிய - மேல் உலகில் உள்ள பிரமனும் சுழல; வீரன் -
வீரனாகிய இராமன்; எண் அரும் பொருள்கள் எல்லாம் என்பது - தான்
எண்ண முடியாத உலகப் பொருள்கள் எல்லாவற்றின் வடிவமாக உள்ளவன்
என்பது; தெரிந்தது அன்றே - நன்கு விளங்கியது.

     அனைத்தும் அவனான படியினாலே அவன் மனநிலை மாறிச்
சினந்தவுடன் அனைத்துப் பொருள்களும் நிலை திரிந்தன என்றபடி. கால் -
காற்று, விரிஞ்சன் - பிரமன், மால்வரை - உரிச்சொல் தொடர், ஐ -
சாரியை, அன்றே - ஏகாரம் தேற்றம்.                            115

    குறித்த வெங்கோபம் - (இராமன் மனத்தில்) கொண்ட கொடிய
சினம்; யார் மேல் கோளுறுங் கொல் - யாவர் மேல் செலுத்தப்படும்
கொல்; என்று அஞ்சி - என்று எண்ணி அஞ்சி; உலகம் எல்லாம் -
உலகங்கள் எல்லாம்; வெறித்து நின்று - திகைப்படைந்து நின்று;
விம்முறுகின்ற வேலை - கலங்குகிற நேரத்தில்; பொறிப் பிதிர் படலை -
பொறிகளின் தொகுதி; செந்தீப் புகையொடும் பொடிப்ப - சிவந்த நெருப்பு
புகையுடன் தோன்றும் படி; எறிப்பது ஓர் முறுவல் பொம் என்று தோன்ற
- ஒளி விடுவதான ஒப்பற்ற புன்சிரிப்பு பொம் என்று தோன்ற; இராமனும்
இயம்பல் உற்றான் - இராமனும் சில கூறத் தொடங்கினான்.

     இராமனது சினம் யார் மேல் செல்லுமோ என அனைத்துலகும்
திகைத்து நின்ற நிலையில், செந்தீப் புகையொடு எழ அவன் வெகுளி
கொண்டு புன்முறுவல் பூத்துக் கூறலானான் என்பதாம். கோளுறுதல் -
செல்லுதல். வெறித்து - திகைத்து. படலை - கொழுந்துத் தொகுதி. பொம் -
ஒலிக் குறிப்பு; பிதிர்தல் - சிதறல். கொல் - ஐயப் பொருள் தருவதோர்
இடைச்சொல். உலகம் - இடவாகுபெயர்.                          116