பின் தமது முடிவு வரையிற் சுருங்காமல் விரும்பியது விரும்பியதாயிருப்பதே நட்புடைமையாம்; தோட்டகயப் பூப்போல் முன் மலர்ந்து பின் கூம்புவாரை - அவ்வாறின்றி அகழ்ந்தெடுத்த நீர்நிலைகளிற் பூக்கும் இதழ்மிக்க பூக்கள் போல் தலைநாளில் மகிழ்பூத்து நாளடைவில் மனஞ்சுருங்கும் இயல்பினரை, நயப்பாரும் நட்பாரும் இல் - விரும்புவாரும் நேசிப்பாரும் உலகில் இல்லை.

(க-து.)கூடிப் பின் பிரியா இயல்பினரே நேசித்தற்குரியர்.

(வி-ம்.)வேட்டது வேட்டதே நட்பாட்சியாம் என்று மாறுக. வேட்டதென்றது ஈண்டு விரும்பி நேசித்ததென்னும் பொருட்டு. "உயர்ந்த வேட்டத்து உயர்ந்திசினோர்"¹என்பது புறம். இதழ்மிக்க நீர்ப்பூ என்னும் குறிப்பு. முதலில் தோற்றத்தால் நேயம் பெருகித் தோன்றுதல் உணர்த்தும். மலர்தலுங் குவிதலுமென்றற்கு, நேயத்தால் உள்ளம் மலர்தலுங் குவிதலும் என்று கொள்க. நயத்தல், விரும்பி மதித்தல்; நட்டல் - அணுகி நேசித்தல் என்க.

(5)

216. கடையாயார் நட்பிற் கமுகனையர்; ஏனை
இடையாயார் தெங்கி னனையர்;- தலையாயார்
எண்ணரும் பெண்ணைபோன் றிட்டஞான் றிட்டதே,
தொன்மை யுடையார் தொடர்பு.

(பொ-ள்.)நட்பில் - நேயமுறைமையில், கடையாயார் கமுகு அனையர் - கீழோர் பாக்கு மரத்தின் இயல்பை ஒத்தவர்; இடையாயார் தெங்கு அனையர் - இடைத்தரமானவர் தென்னை மரத்தின் இயல்பை ஒத்தவர்; ஏனைத் தலையாயார் தொன்மையுடையார் தொடர்பு - ஏனை உயர்ந்தோரெனப்படும் பழைமை கருதுவாரது நட்பு, எண் அரு பெண்ணைபோன்று இட்டஞான்று இட்டதே - மதிப்பு மிக்க பனை மரத்தின் இயல்புபோன்று நேயம் ஊன்றிய போது ஊன்றியதேயாம்.

1. புறநா. 214 : 6.